फाप्ला: धनगढीमा जारी अर्जुन ट्रफी राष्ट्रिय क्रिकेट प्रतियोगितामा न्यु होराइजन बुटवलले विजयी सुरुवात गरेको छ ।
मंगलवार भएको पहिलो खेलमा होराइजनले दशरथ चन्द क्रिकेट एकेडेमी बैतडीलाई ५१ रनले पराजित गर्दै सुखद सुरुवात गर्याे।
होराइजनले दिएको १ सय ५८ रनको लक्ष्य पछ्याएको दशरथ १४.५ ओभरमा १ सय ६ रनमा समेटियो ।
दशरथका लागि बसन्त खत्रीले सर्वाधिक २० रन जोडे । हिमाल दाैल्यालले १९, सुमित बुडालले १४ र दिवान पुनले १२ रन जोड्दा अन्य ब्याटरले दोहारो अंकमा रन बनाउँन सकेनन् ।
तुलबहादुर थापाले ३, विपर्सन केसी र वीर मगरले समान २ तथा महेश भार, सिद्धान्त शाही र निर्मल गुरुङ समान १ विकेट लिए ।
त्यसअघि फाप्ला क्रिकेट मैदानमा टस हारेर पहिले ब्याटिङको निम्तो पाएको होराइजनले २० ओभरमा ५ विकेट गुमाएर १ सय ५७ रनको योगफल तयार गरेको थियो ।
होराईजनका लागि दिपक डुम्रेले सर्वाधिक ४५ रन जोडे । आरिफ खानले ४१,कप्तान दिलिप नाथ र प्रतिक श्रेष्ठले समान २० रन जोडे ।
बलिङतर्फ दशरथका लागि कप्तान भुवन कार्कीले २ तथा खडक बोहोरा, सलाउदिन खान र रुपेश सिंहले समान १ विकेट लिए।
याे जितले बुटवलले २अंक सुरक्षित गरेकाे छ । लगातार दाेस्राे खेल हारेकाे बैतडी प्रतियोगिताबाट बाहिरिएको छ।
गो ड्रिमर्सको आयोजनामा सुरु भएको प्रतियोगिताको विजेताले नगद १० लाख र उपविजेताले नगद पाँच लाख पाउनेछन् ।